عمري قصـير

عمري قصير

عمري قصير وتالي العمر لله الرحيل
مير الله اللي يعفو ويغفر ذنوبٍ كايدات

اللي إليه أسجد وأصلي وأعبده ليل ومقيل
أرجيه وأشكي له همومي فـكل حين وكل صلاة

فردٍ صمد .. ما له شبيه من المخاليق ومثيل
اللي على العرش استوى من فوق سبع السماوات

يارب .. أنا طالبك تقبل توبة العبد الذليل
اللي ذنوبه حملها حمل الجبال الراسيات

ومن ماقف الحقران والذل يارب تقيل
عثرات عبدٍ يرتجي منك العفو قبل الممات

لاحشرجت بالصدر روحي والجسد ميت هزيل
ما ينجي إلا رحمتك .. يارب أسألك النجاة

ولا من توسّدت التراب ابلا رفيق ولا خليل
ثم ابتدت رحلة طويلة في دروب مهوّلات

الله عليمٍ في خفاياها وطاعته الدليل
والخاسر اللي ضيّع دروبه بفعل السيئات

والفايز اللي قدّم أعمالٍ لها وزن ثقيل
في يوم نبعث والقبور من الذهول مبعثرات

في يوم لاينفع معه مالك .. وجاهك .. والعويل
ماينفعك ياكود قلبٍ خالي من المخزيات

في يوم يجمع فيه خلق الله جيلٍ بعد جيل
يومٍ عبوسٍ قمطريرٍ مذهلٍ للمرضعات

والشمس تدنى من رؤوس الخلق ابمقدار ميل
يوم يتذكر كل إنسانٍ سواته فـالحياة

يوم الصحف تنشر وتوضع في موازين تكيل
وكلّن يلاقي ما عمل من خير وشرٍ محضرات

ماعاد ساعتها أدور غير رحماتك بديل
وتمنن علي بلطفك وعفوك ثبات في ثبات

واغفر ذنوبي واقبل أعمالي ولو كانت قليل
وارزقني ياربي جزيل الباقيات الصالحات

يارب .. يارحمن .. اقبل توبتي قبل الرحيل
واجعل إلهي مسكني جنات عدن العاليات

وختام أصلي عدّ ما عانق طلوع الصبح ليل
على النبي المصطفى الهادي عدد رمل الفلاة

راقت لي جدا